/// O rondanén'na bjanca njgra e znéla / ch'a t'gir al mónd par costruìr al ni / par ti che téra éla la pu béla? / parchè la vriss andär a vèddor mi. / Mo l'è Pärma ch'l'è speciäla / pjén'na äd vióli profumädi / e l'è tanta muzicäla / da fär tutti un po' cantär...

mercoledì 28 gennaio 2009

Il ponturén'ni äd Batistén Picén -6-

AL RUGBY PRAMZÀN, FJÓL D'UN DÌO PICÉN
Ragàs, pés ch'acsì a'n la podäva mìga andär. Cojj d'al rugby j én pròprja scalognè bombén. I gh'àn un càmp picén picén a Molèddol, ch'al fa rìddor i gàt e adésa, con dò scuädri in Superdéz e l'Òvermach ch'al zùga ànca in-t-'na Còppa evropèjja, j én restè ànca sénsa còll. L'è bastè un cicinén 'd néva e 'l càmp l'è dvintè un pantàn. Adorni, l'asesór al sport, l'a dit ch'al Cmón l'a fat tutt al posìbbil par tgnìr al càmp in bón'ni condisjón, mo ch'la cólpa l'è tutta d'la néva, dal zél e 'dl'acua ch'l'è gnùda zò. Adorni, ti 't si un bräv ragàs (a's fa par dìr, ragàs) mo còssta chì la m'va mìga zò. L'è cólpa 'dla néva, dal gél e 'dl'acua? Ànca dal Spìrit Sànt, fórsi? Valà, Adorni, fèmma mìga rìddor... Al mónd dal rugby da témp al rìdda a vèddor che l'Òvermach al zùga int-un campètt. E adésa a gh'è 'sta béla novitè. Al Cmón al podäva fär cuél in vissta 'd'l'invèron... O no? Il sàn tutti che in invèron a pióva, a néva.... O fòrsi al rugby pramzàn l'è fjól d'un Dio picén? Al pòvor Barslén, al presidént dl'Òvermach, al dìz sémpor ch'al se vargòggna äd dìr aj ingléz, aj francéz, aj scoséz, ch'la so scuädra l'è restäda, in sostànsa, sénsa càmp sportìv... E adésa? Sàbot i vàn a zugär a Mòdna cóntra la Capitolina. A Mòdna, avì capì? Mo a Mòdna a gh'è cuälcdón ch'al sa coz'él al rugby? Par fortón'na ch'adésa l'è rivè 'l momént 'dla Nasjonäla, pr'al Sés Nasjón. Sperèmma che, dòpa, al càmp picén 'd Molèddol al se sìa sughè. Ragàs, basta. A'm són rabì.

1 commento:

Astra 1996 Parma ha detto...

Dìl a mì c'le s'sant'an ca spet un camp da balò per l'Astra e 'm toca fèr alenèr dozent quaranta ragazèn int'al camp parociel ed Via Isola o ed Via Confalonieri!!!
Oh, al'USL però i g'han cam da balò e da alenament e solament 'na scuedra d'amator. Ma va là, Adorni... Vàt a fèr frizor.
Sperema c'as continua a costruir del ciesi altrimenti i societè amatorieli col kebab i mòron...