O rondanén'na bjanca njgra e znéla / ch'a t'gir al mónd par costruìrt al nì / par ti che téra éla la pu béla? / parchè la vris andär a vèddor mi. / Mo l'è Pärma ch'l'è speciäla / pjén'na äd vióli profumädi / e l'è tanta muzicäla / da fär tutti un po' cantär. / Int’il gróndi cuànd a pióva / l’àcua t‘ f a la sérenäda / e in-t-il tòrri traforädi / dvénta muzica anca al vént. /O lezgnolén ch’a t’ gh’é la góla dòra / indo ät imparé a cantär csi bén? / Al to gorghègg da ‘dentor tutti al fóra / e il coppiètti alóra is fan l’océn. / J’ò imparé a stär su ‘na pianta / cla se spécia in-t-un laghètt / indo gh’é un izolètta / con di ciggn bianch e morètt. / Tutt il siri là sentiva / i béj cant ädla coräla / e ’l me cór picén al capiva / che csì sól a s’ pól cantär.


martedì 25 novembre 2008

IL PONTURÉN'NI ÄD BATISTÉN PICÉN -2-

I BÓROGH DEDLÀ DAL'ÀCUA L'ätor dì a j'ò vìsst un vcètt dedlà dal'àcua ch'al m'à dìtt: "Batistén, in coll cuartér chi, a gh'è di bórogh ch'j'en un dizàstor. Cuànt Madonni a tìr tutti i dì in vìa Rismónd!... A gh'è i marciapjè antìgh cme'l mónd, frùsst cmé l'Albanìa, ch'a pära d'ésor ancòrra in-t-j àni Sincuànta, cuànd mi éra un gionvòt. A gh'è sémpor al perìccol äd scapusär. Fa cuél, Batistén".
Alóra a son andè a controlär. A'l gh'äva ragión col vcètt là. I marciapiè j éron tutti scarlinghè, a gh'vól pròprja un njént par scapusär. Mi 'n gh'éra miga in-t-j àni Sincuànta, mo a j'ò vìsst il fotografìi. I marciapiè j én compàgn, sémpor coòjj. E färon di nóv? Ànca l'iluminasjón l'è vécia. In ätri strädi j gh'àn miss di béj lampión, chì invéci a sèmma aj témp äd me nòn'. Situasjón compàgna in vìa 'dla Salùta.
Savì che par mi l'è la pu béla sträda ad Pärma? Tutti chil ca piturädi ala manéra äd Muràn, Copenàghen... J vénon da vìa par vèddor chil ca chì. Mo ànca chì... l'illuminasiòn l'è vécia, trìssta bombén. J m'àn dìtt ch'al Cmón da témp al vól rimodarnär al cuartér e mi a son sicùr ch'al pénsarà ànca al'iluminasjón d'il strädi. Mo ch'a gh'dàga adrè. E ch'al pensa primma äd tutt ai marciapiè.
Mi a j'ò vìsst ch'a gh'è un lavór in córs in bórogh Pàja. Mi a spér che dopa j vàn avànti ànca in via Rismónd. Senò i vcètt j'andràn adrè a scapusär e a tirär d'il Madònni...
(Nelle foto, dall'alto - CLICCARE PER INGRANDIRE - : 1) Batistén Picén /by Sylvia Massera © /; 2) Via Rismondo con i marciapiedi dissestati /by e.g./; 2) Via della Salute /by e.g./; 3) Lavori in corso in Borgo Paglia /by e.g./)

Nessun commento: