/// O rondanén'na bjanca njgra e znéla / ch'a t'gir al mónd par costruìr al ni / par ti che téra éla la pu béla? / parchè la vriss andär a vèddor mi. / Mo l'è Pärma ch'l'è speciäla / pjén'na äd vióli profumädi / e l'è tanta muzicäla / da fär tutti un po' cantär...

martedì 18 novembre 2008

IL PONTURÉN'NI ÄD BATISTÉN PICÉN -1-

LA PÄRMA VOLADÓRA - Mi al masärìss còll ch'à pensè par primm, un gióron, äd tór via dala memòrja la me Pärma Voladóra. J àn fat cl'a ròba là, a Maràn, còll "bacino di espansione" (par parlär cmé i polìttich), c'la diga, a färla curta, ch'la véna bón'na par tgnir da cont l'àcua par strajärla po d'istè, cuànd a pjóva mäi. Ala fén di cónt l'era miga n'idéa balsàna, però al rizultät l'è stè n'ingiùrrja p'r un pramzän dal sas. L'àcua la fäva paura, la saltäva su a molinél, l'andäva cme 'l vént atàch aj ärzon cl'a paréva al conträri äd Lucaréli grand. La bacajäva: la fäva 'na spécia äd ruzz cmé cóll d'un leòn. Mo l'éra acsì béla. D'avtón e d'inväron in-t-j àni S'sànta e Stànta l'era 'na spécia äd cerimònja pr'i pramzàn. J stävon lì, insìmma ai pónt, a guardär l'àcua con preocupasjón tutta la sìra. "La vén, la vén". A savì la stòrja äd San Giovanni Nepomuceno? Cuànd a gh'era la caplén'na insìmma al Pont äd Mez? I gh'àn cambjè nòmm e l'àn trasformäda in San Giovanni Né pu Né meno pròprja par la Pärma Voladóra. Tant àni indrè a gh'éra stè n'àcua che Idio la mandäva. Da fär paura dabón. J cardävon che l'àcua la sarìss andäda fóra daj ärzon e la se sarìss strajäda in-t-la citè.
Acsì i pramzàn d'alóra a fävon la rónda insìmma al Pónt äd Mez, indòvva gh'éra la caplén'na äd San Giovanni Nepomuceno, par controlär la situasjón.
J fävon i tùron. Cuànd a's dävon al càmbi, i nóv rivé a dmandävon: "Cmé vala?". E j ätor, cuànd la situasjón l'era miga cambjäda, rispóndèvon: né pu né méno".
Batistén Picén
(Nella foto: il disegno originale di Batistén Panäda. Presto ci sarà la nuova figura del "nipotino", Batistén Picén)

1 commento:

e.piovani ha detto...

sarebbe bello ricostruirla la cappella di San Giovanni sul Ponte... Non solo per rispetto alla storia di Parma, ma anche per dare al ponte una immagine più interessante.