IL PONTUREN'NI ÄD BATISTÉN PICÉN -3-

J BÙTON ZÒ AL PALARASCHI - S'a gh' fùss ancòrra al pòvor Bruno Raschi a'l se mettrìss a cridär. Mo parchè al Cmón al vól butär zò al so bél Palasètt? Co l'à fat äd mäl? Tutt pr'i dindón. Al Cmón l'à decìs äd mèttor in véndita tutta l'àrea par catär su cuinndoz miljón, oh, cuinndoz miljón, äd euro.J ävon miga dit cuàtor, prìmma? Adésa j én dvintè cuinndoz... E 'na volta vendù, coza sucédarà?
Mi a'n crèdd miga che, dopa aver spés tutta cla cìffra lì, j lässon stär al palasètt indo' l'è. A gh' faràn di ca, o, ajùt ajùt, un bél gratacél... E al sport pramzàn indo' và'l? In Zvìssra? Schèrs a pärta, l'è 'na cuestión ingarbujäda, al pónt ch'l'è nasù un comität par diféndor al nòstor palasètt. Vìsst ch'al Cmón l'à bele deliberè al sarà difiìccil ch'al torna indrè, mo alméno a sperèmma ch'al tènna in considerasjón ànca al sport pramzàn.
J spéndon tant dindón par la cultùra, e l'è 'na còza béla, par caritè, e po j se scordon d'al sport? Èmma vìsst co è sucés pr'al rugby... Èmma dò scuädri in-t-al Super 10 e j vàn a zugär in' t-un campètt... Ultimamént èmma fat rìddor tutt al mónd d'al rugby. La provìncia äd Pärma l'a gh'à cuàtor scuädri importànti (Overmach, Gran, Colórni e Nozèjj) e la nasjonäla äd Mallet l'è andäda a zugär (mäl) a Cuadronja! In fén di cónt la podäva miga zugär a Molèddol... Mi a son in pensér. A gh'è mäl. Co sucedarà dòpa ch'j avràn zmantlè al Raschi? J faràn n'ätor Palaeventi cmé còll Palacassa äd Bagansóla ch'al cossta tròp e , in sostànsa, l'è...dizocupè?
A j'ò parlè con Sergio Greci, al vicepresidént d'al Cìrcol Inzani. L'è preocupè bombén. "E adésa co fèmma?", l'à dit. "Si j bùton zò al palasètt nojätor a perdèmma ànca il paléstri chi j'én sòtta. A gh'n'è sìncov o séz. Sól nojätor dal cìrcol n'èmma tri, pr'al judo, la lòta greocoromana e la ginàstica... A ghèmma 632 iscrìtt, con cuatorsént putén. Indo' vànj dòpa? E po j perdon al lavór ànca còjj d'al bar e cojj dl'impréza d'il pulisii. A färla cùrta, un dizàstor. Sperèmma ch'al comität a gh'la fàga a otgnìr cuél äd pozitìv..."
(Nelle foto, dall'alto: 1) Batistén Picén /by Sylvia Massera ©; 2) Bruno Raschi; 3) Il PalaRaschi /dal sito Parmaitaly.com/; 4) Sergio Greci, vicepresidente del Circolo Inzani)